بەرانبەر بە |

ناسر باباخانی: "كه‌مپەین به‌شێكه‌ له‌ بنەماڵەی گەورەی حیزبی دێموكرات

{xtypo_rounded2}

ناسر باباخانی: كه‌مپەین به‌شێكه‌ له‌ بنەماڵەی گەورەی حیزبی دێموكرات، به‌شێكی وه‌ده‌نگ‌هاتوو، وه‌زاڵه‌هاتوو له‌ بارودۆخی ڕۆژهه‌ڵات و له‌ بارودۆخی حیزب.

{/xtypo_rounded2}

ناسر باباخانیسەرنجتان بۆ دەقی ئەو دیمانەیە رادەکێشین کە لەگەڵ ناسر باباخانی، بەرپرسی کەمپەینی یەکی بەفرانبار، رێکخراوە.

رۆژهه‌ڵات تایمز- هه‌مزه‌ ئاگوشی

وەک یەکەم پرسیار، هۆکاری دامەزراندنی كه‌مپه‌ینی یه‌كی به‌فرانبار چ بوو؟ بە گشتی دەوری ئەم چەشنە کەمپەینانە چۆن هەڵدەسەنگێنی؟

ئەگەر بمهەوێ زۆر بە کورتی باسی هۆکاری دامەزراندنی کەمپەین یه‌كی به‌فرانبار یان کەمپەین‌گەلێكی هاوشێوە بکەم له‌ ڕاستی‌دا بیرۆكه‌ی ساز بوونی كه‌مپه‌ینی یه‌كی به‌فرانبار ده‌گه‌ڕێته‌وه‌ سه‌ر چه‌شنێ بۆشایی فكری - ڕێكخراوه‌یی له‌ ناوخۆی ڕۆژهه‌ڵات و تاراوگه‌ (مه‌به‌ستم هه‌م باشوورە‌ و هه‌م ئورووپا). واتە بۆشایی‌یەکی بیرۆکەیی لە ڕۆژهەڵات‌دا هەیە کە پێویستە پڕ کرێتەوە و پاشان لە قالبێکی ڕێکخراوەیی‌دا پراکتیزە کرێ.

ئێمه‌ زۆر جاران له‌گه‌ڵ هه‌ندێ دیارده‌ و پێشهاته‌ به‌رەوڕوو ده‌بین كه‌ هه‌ندێ جار چاوه‌روان‌نه‌كراون... ئه‌م خێرایی‌یه‌ ده‌رفه‌تی ئه‌وه‌ت ناداتێ خۆ ڕێكخه‌ی و خۆ ته‌یار كه‌ی بۆ دژكرده‌وه‌یه‌كی خێرا و به‌جێ و زۆرجاران له‌ كیست ده‌چێ. ئه‌م ڕووداوانه‌ سه‌رجه‌م پێشهاته‌ سیاسی، كۆمه‌ڵایه‌تی، فه‌رهه‌نگییەکان و ته‌نانه‌ت په‌یوه‌ندیدار به‌ ماڤی مرۆڤن كه‌ له‌ ناوخۆ و له‌ تاراوگه‌دا ڕوو ده‌ده‌ن. هەر بۆیە بوونی ڕێکخراوەیەکی فکری بۆ مۆنیتۆرینگی ڕووداوەکان پێویستە. كه‌مپه‌ین له‌و ڕاستایه‌دا وه‌ك ویژدانێكی ئاگا و به‌رپرس هه‌ڵوێستی خۆی نواندووه‌. به‌ڵام پێم خۆشه‌ ئاماژه‌ به‌م خاڵه‌ گرینگەش‌ بكه‌م کە به‌رله‌وه‌ی وه‌ك كه‌مپه‌ینێكی ڕێكخراوه‌یی سه‌یری كه‌مپه‌ینی یه‌كی به‌فرانبار بكه‌ین ده‌كرێ بڵێین زیاتر ڕه‌وتێكی فكرییه‌ به‌ تام و بۆنێكی سیاسییه‌وه‌.

دیارە حه‌وجێ به‌ كوتن ناكا له‌ ژێر سایه‌ی ده‌سه‌ڵاتی كۆماری ئیسلامی‌دا چالاكی سیاسی واته‌ زیندان و په‌ت و سێداره‌ و چالاكییه‌كانی تریش به‌ توندی كۆنتڕۆل ده‌كرێن. هه‌ر بۆیه‌ ناكرێ و ناشبێ زۆرمان چاوەڕوانی له‌ ناوخۆ هه‌بێ، هه‌رچه‌ند با ویژدان سه‌نگی مه‌حه‌ك بێ هه‌ندێ كار و چالاكی له‌ لایه‌ن چالاكڤانانی سیاسی و مه‌ده‌نی هاتۆته‌ ئاراوه‌ كه‌ له‌ قۆرگی شێردا كراوه‌... سه‌باره‌ت به‌ دۆخی تاراوگه‌ش به‌ داخه‌وه‌ سه‌رجه‌م هێز و لایه‌نه‌ سیاسییه‌كان له‌ دۆخێكی خه‌سیودان و لەهەمبەر کێشەکان نه ‌بایان پێدا هاتووه‌ و نه‌ باران! كه‌ وا بوو له‌ گه‌ڵ دۆستانی ماندوویی‌نه‌ناسی كه‌مپه‌ین هاتینه‌ سه‌ر ئه‌م قه‌ناعه‌ته‌ كه‌ بوونی كه‌مپه‌ینێك به‌م تایبه‌تمه‌ندییانه‌وه‌ پێویستییه‌كی حاشاهه‌ڵنه‌گره‌.

بۆ زانیاریتان هه‌ر چه‌ند كاره‌كانی كه‌مپه‌ین تاقمێكی یه‌كجار سنووردار ڕایده‌په‌ڕێنین به‌ڵام پرس و مه‌سڵه‌حه‌ت و ڕاوێژ و ئیده‌ وه‌رگرتن له‌ چالاكڤانانی ناوخۆ، ئه‌ندام و لایه‌نگرانی هێزه‌ سیاسییه‌كان، سیما دیار و ناسراوه‌كانی سیاسی فه‌رهه‌نگی كوردستان، ئێستراتێژی سه‌ره‌كیمان بووه‌ و لامان وا بووه‌ ئاوا ده‌نگمان كاریگه‌رتره‌ كه‌ به‌ ته‌جره‌به‌ش ئەوەمان بۆمان ده‌ركه‌وت.

ماوەیەک زۆر بە گەرموگوڕی لە کەمپەینی یەکی بەفرانباردا مەسەلەییەکگرتنەوەی دوو باڵی دێموکراتتان ورووژاند، ئەو هەوڵانە بە کوێ گەیشتن؟

له‌ وه‌ڵامی پرسیاره‌كه‌ی جه‌نابت‌ دا، ده‌بێ بڵێم: به‌ڵێ، ڕاسته. بەڵام هه‌ر وه‌ك بۆخۆشتان ده‌زانن له‌ به‌رەوپێشبردنی پڕۆژه‌یه‌ك‌ یان گه‌لاڵه‌یه‌ك‌دا تاكتیكه‌كان ئاڵوگۆڕیان بەسه‌ردادێ. ده‌بێ هێندێ جار شله‌ی بده‌یه‌ی، كه‌شوهه‌وا ئه‌هوه‌ن كه‌یه‌وه، یان به‌ پێچه‌وانه‌، گوشار و زه‌خته‌كان زیاتر بكه‌ی. له‌ په‌یوه‌ندی لەگه‌ڵ پرسی یه‌كگرتنه‌وه‌ی دوو باڵی حیزبی دێموكرات‌دا، پرسه‌كه‌ زۆر زۆر هه‌ستیارتره‌... كۆمه‌ڵێ گرفتی لەمێژینه‌ و چه‌ند ساڵه‌ هه‌یه‌ كه‌ به‌ داخه‌وه‌ تێكه‌ڵ به‌ ڕق و قین و بوغزێكی شاراوه‌ و نه‌شاراوه‌ و لە هەمان کاتیش‌دا تاکەکەسی بووه، هه‌ر بۆیه‌ ئاسایی‌یه‌ كه‌ له‌ هه‌ندێ كات‌دا ئه‌م گه‌رموگوڕییه‌ له‌ كزی بدا، به‌ڵام ده‌بینی له‌ كاتێكی تردا، به‌ هۆی زرووفێكی زه‌مانییه‌وه‌ یان بۆنەیەکی تایبەتییەوە تێیهه‌ڵدێنییه‌وه‌. با نموونه‌یه‌كت بۆ باس بكه‌م:

له‌ سه‌ره‌تای ده‌ستپێكردنی پڕۆسه‌كه‌ كه‌ به‌ ده‌ركردنی بانگه‌وازی كه‌مپه‌ین به‌ ده‌نگی بەڕێز كاك ئه‌حمه‌دی شێربه‌گی ده‌ستی پێكرد، بڕوات هه‌بێ زۆر كه‌س په‌یوه‌ندییان پێوه‌ گرتین كه‌ ئه‌م بانگه‌وازه‌ گریاندوونی (هه‌ر ئه‌مە بوو به‌ هۆی بڵاوبوونه‌وه‌ی ڕاپۆڕتێك له‌سه‌ر كاك ئه‌حمه‌د كه‌ له‌ کاناڵی ڕووداو بڵاو بۆوه‌ و كارتێكه‌رییه‌كی بێ‌وێنه‌ی له‌سەر خەڵکی ناوخۆ و له‌سەر دوو لایەنەکەی نیشتەجێی باشوور دانا) دواتر بڵاوكردنه‌وه‌ی زیاتر له‌ هه‌شتا گرته‌ی ڤیدیۆیی به‌ هیممه‌تی كوڕه‌كانی كه‌مپه‌ین له‌سه‌ر سۆشیاڵ میدیا وه‌ك فه‌یسبووك، یوتیووب و تویتێر و دانانی وێنه‌ی كه‌سایه‌تییە ناسراوە سیاسی فه‌رهه‌نگییەکانی سه‌ر به‌ هه‌ر دوو لا ته‌نانه‌ت سه‌ربه‌خۆش، شه‌پۆلێكی گه‌وره‌ی له‌ هیوا و ئومێدی ساز دا بۆ یه‌كگرتنه‌وه.

پاش ئه‌م قۆناغه‌ واته‌ قۆناغی یه‌كه‌م... به‌ هۆی ئه‌وه‌ی كه‌ ئێمه‌ لامان وا بوو ده‌نگی بژارده‌كانی كۆمه‌ڵگا‌و ته‌نانه‌ت ده‌نگی خه‌ڵكی ڕۆژهه‌ڵات (كه‌ به‌ به‌رزكردنه‌وه‌ی پلاكاردی به‌ڵێ بۆ یه‌كگرتنه‌وه‌ی دێموكرات له‌ ناوخۆڕا هانده‌رمان بوو) گه‌یوه‌ته‌ سه‌ركردایه‌تی سیاسی و له‌ سه‌ر ویستی ڕێبه‌رایه‌تی حدكا به‌ڕێز كاك مسته‌فای هیجری كه‌ من خۆم به‌ ته‌له‌فۆن په‌یوه‌ندیم پێوه‌ گرت، پێی باش بوو باسه‌كه‌ زۆر به‌ میدیایی نه‌كرێ، هه‌رچه‌ند به‌ڕێزیان زۆری پێشوازی له‌و هه‌نگاوه‌ی كه‌مپه‌ین كرد. دیاره‌ بەڕێز كاك خالید عه‌زیزیش سکرتێری حدك هه‌ر له‌ په‌یوه‌ندی ته‌له‌فۆنیدا بوونی كه‌مپه‌ین و كاره‌كانی به‌ شتێكی زۆر ئه‌رینی وه‌سف كرد. بەهەر حاڵ ئێمه‌ له‌ سه‌ر قسه‌كانی كاك مسته‌فا بڕێكمان شله‌ به‌ كاره‌كانمان دا... به‌ڵام توانیمان ئه‌م باسه‌ بكه‌ین به‌ مژاری سه‌ره‌كی ڕۆژهه‌ڵات... باس باسی یه‌كگرتنه‌وه‌ بوو... ئێمه‌ قۆناغه‌كانی دووهه‌م و سێهه‌ممان واته‌ دۆزینه‌وه‌ی مكانیزم و ڕێكار به‌ شتێكی فه‌ننی ده‌زانی كه‌ ده‌توانێ بۆ پرسی یه‌كگرتنه‌وه‌ بۆ هه‌ر دوو لا به‌ كه‌لك بێ، هه‌ر بۆیه‌ له‌ سه‌ر ڕاسپارده‌ی كاك مسته‌فا حه‌ولمان دا باسه‌كه‌ زۆر نه‌ورووژێنین تا دانیشتنه‌كان له‌ كه‌شێكی ئارام و مه‌نتقی‌دا به‌ڕێوه‌ بچێ... مه‌به‌ستی ئێمه‌ پێكرا بوو... ده‌ست پێكردنه‌وه‌ی دیالۆگی نێوان هاوڕێیان! خۆتێوه‌گلان له‌م به‌شه‌دا نه‌ كاری ئێمه‌یه‌ و نه‌ په‌یوه‌ندی به‌ ئێمه‌وه‌ هه‌یه، ئه‌مه‌ په‌یوه‌ندی ڕاسته‌وخۆی به‌م دوو باڵه‌وە هه‌یه... به‌ڵام ئه‌وه‌ی كه‌ ئێمه‌ چاوه‌ڕوانمان ده‌كرد كه‌ وت‌ووێژه‌كان به‌رده‌وام بن نه‌هاته‌دی... هه‌ر بۆیه‌ سه‌رلەنوێ پڕۆژه‌یه‌كمان تاریف كرد كه‌ هه‌م كه‌مپه‌ین وه‌گەڕ كه‌وێته‌وه‌ و هه‌م پرسی یه‌كگرتنه‌وه‌ی دێموكراته‌كان. بۆ ئه‌م مه‌به‌سته‌ بڕیارمان دا هه‌موو ساڵێ له‌ ڕۆژی ١٠ی خاكه‌لێوه‌دا ڕۆژی شه‌هیدانی كوردستان خه‌ڵاتێك به‌ ناوی خه‌ڵاتی نه‌ته‌وه‌یی كه‌مپه‌ینی یه‌كی به‌فرانبار بدرێ به‌ كەسایه‌تییه‌كی سیاسی كه‌ له‌م ساڵەدا زیاترین ئه‌ركی بۆ ڕۆژهه‌ڵات كێشاوه.‌ پاش ڕاوێژ و پرسێكی زۆر بڕیارمان دا كه‌ ئه‌م خه‌ڵاته‌ پێشكه‌ش بكرێ به‌ به‌ڕێز کاک ئه‌حمه‌د شێربه‌گی كه‌ جگه‌ له‌وه‌ی بۆ ماوه‌ی بیست ساڵ بە ده‌نگی خۆی كووره‌ی خه‌باتی نێڵ ده‌دا، به‌ تایبه‌تی ئەم ‌ساڵ بۆ یه‌كگرتنه‌وه‌ی دێموكراته‌كان وەک زێی خوڕ ساتێ هەدادانی نەبوو... ئه‌م كاره‌ سه‌رلەنوێ پرسه‌كه‌ی ورووژاندوه‌... مه‌به‌ستم ئه‌وه‌یه‌ كه‌ بڵێم تاكتیكه‌كانی ئێمه‌ به‌رده‌وام بۆ یه‌كگرتنه‌وه‌ بوونی هه‌بووه‌، هەرچەند هه‌ڵكشان و داكشانی به‌ خۆوە بینیوه‌ بەڵام ڕاوه‌ستانی نه‌بووه‌، ئێستاش له‌م یاسا و ڕێسایه‌ به‌ده‌ر نییه‌ و حە‌وڵه‌كانی به‌رده‌وامە و دڵنیاتان ده‌كه‌مه‌وه‌ سه‌ره‌ڕای كۆسپ و له‌مپه‌رێكی زۆر ئاواتی گه‌لی كورد له‌ ڕۆژهه‌ڵات وه‌دی دێ.

له‌ لایه‌ن ڕێبه‌رایەتی ئه‌و دوو لایه‌نه‌ چۆن پێشوازی له‌و كه‌مپینه‌ كراوه؟

با سادقانه‌ ئه‌وه‌ بڵێم به‌ش به‌ حالی خۆم پڕ به‌ دڵ سپاسی به‌ڕێزان كاك خالید و كاك مسته‌فا ده‌كه‌م. لێت ناشارمه‌وه‌ تێبینی هه‌ر دوو به‌رێز له‌ سه‌ر پرسی یه‌كگرتنه‌وه‌یه‌كی مه‌نتقی و له‌ هه‌مان كات‌دا له‌ سه‌ر بنه‌مایه‌كی خه‌سارناسانه‌ و پاراستنی كه‌رامه‌تی تاكه‌كانی حیزب، بۆ من دڵخۆشكه‌رن. په‌یوه‌ندی من له‌گه‌ڵ كاك مسته‌فا و كاك خالید چه‌ند جارێك بووه‌ به‌ شێوه‌ی ڕاسته‌وخۆ و ته‌نانه‌ت ناڕاسته‌وخۆ كه‌ له‌وپه‌ڕی ڕێزدا بووه‌، به‌ڵام با ئه‌م ڕاستییه‌ش بدركێنم كه‌ هه‌نگاوه‌كانی كاك خالید بۆ یه‌كگرتنه‌وه‌ پڕاكتیكتر هاتۆته‌ به‌رچاو. دیاره‌ ئێمه‌ له‌گه‌ڵ ئه‌ندامانی ده‌فته‌ری سیاسی و كۆمیته‌ی ناوه‌ندی هه‌ر دوو باڵ په‌یوه‌ندیمان هه‌بووه‌ و هه‌یه... به‌ڵام خۆزگه‌ ده‌خوازم وه‌ك چۆن له‌م په‌یوه‌ندییانەدا ڕاشكاوانه‌ باسی زه‌رووره‌تی یه‌كگرتنه‌وه‌ ده‌كه‌ن له‌ سه‌ر میدیاكانیش هه‌ر به‌م تۆخییە ده‌ركه‌ون!

بە قەولی بێیهەقی مێژوونووسی فارس ڕووزه‌ردی مێژوو دە‌بم ئەگەر لێره‌دا كه‌وانه‌یه‌كیش له‌ سه‌ر بەڕێز مامۆستا عەبدوڵڵا حه‌سه‌ن‌زاده‌ نەكه‌مه‌وه كه‌ له‌ په‌یوه‌ندی لەگه‌ڵ به‌ڕێزیان‌دا له‌وپه‌ڕی خاكه‌ڕایی‌دا گوێ‌بیسی قسه‌كانمان بوون و زۆر ڕاشكاوانه‌ جه‌ختی له‌ سه‌ر یه‌كگرتنه‌وه‌ كرد. دیاره ئه‌ویش وه‌ك سه‌رجه‌م ئه‌ندامانی ڕێبه‌رایه‌تی هه‌ر دوو لا تێبینی خۆی هه‌بوو. به‌ڵام مه‌به‌ستی من ئه‌وه‌یه‌ كه بڵێم‌ ئیراده‌كه‌ به‌ جیدی له‌ گۆڕێ‌دایه‌ ... ڕه‌نگه‌ هه‌ندی كه‌س بڵێن ئه‌مانه‌ له‌ چوارچێوه‌ی قسه‌ی سه‌رزاره‌كی تێناپه‌ڕن – كه‌ دیسان ره‌نگه‌ به‌رحه‌ق بن – به‌ڵام ئێمه‌ پێمان وایه‌ ئێستا پرسی یه‌كگرتنه‌وه‌ بۆته‌ بایخێكی نه‌ته‌وه‌یی! واته‌ ڕه‌نگه‌ هه‌موو لایه‌ك ڕەخنه‌ی خۆیان هه‌بێ، مكانیزمی خۆیان هه‌بێ، لێكتر ڕه‌نجابن... به‌ڵام دواجار دوامه‌نزڵی پاپۆره‌ سه‌رگه‌ردانه‌ی ناو تۆفانی ده‌ریا بێ‌گومان ڕۆخی یه‌كگرتنه.

چالاكانی كه‌مپه‌ین هه‌ر ئه‌ندامانی ئه‌و دوو لایه‌نه‌ی دێموكراتن یاخود خه‌ڵكی ده‌ره‌وه‌ی ئه‌و بازنه‌شتان له‌گه‌ڵه؟

چالاكانی كه‌مپەین ئه‌ندامانی هه‌ر دوو باڵی دێموكراتن و خه‌ڵكی تریش لە ده‌ره‌وه‌ی ئه‌م دوو لایه‌نه‌ له‌گه‌ڵمانن بۆ وێنه‌ خۆم وه‌ك به‌رپرسی كه‌مپه‌ین ئه‌ندامی هیچ كام له‌ لایه‌نه‌كان نیم. ئه‌وه‌ی به‌ لامانه‌وه‌ گرینگ بووه‌ ڕوانینه‌كان (واته‌ له‌ ده‌ریچه‌ی به‌رته‌سكی باڵ باڵێن) بگۆڕین بۆ ده‌ووره‌ دیمه‌نێكی به‌ربڵاوتر. هه‌مانه‌ ئینتیمای حدكای هه‌یه‌، هه‌مانه‌ ئینتیمای حدكی هه‌یه، هه‌مانه‌ ڕه‌خنه‌ له‌ هه‌ر دوو باڵ ده‌گرێ به‌ڵام سنووری ئه‌خلاقمان نه‌به‌زاندووه‌. بووە لە نێو خۆمان‌دا لە سەر بابەتێک موناقەشەمان کردووە بەڵام هەرگیز دەرگای دیالۆگمان دانەخستووە و لە ئاکام‌دا بڕیاری کەمپەین کۆتایی بە باسەکە هێناوە.

پێتانوایه‌ ئه‌م كه‌مپەینه‌ ده‌توانێ كاریگه‌ری له‌ سه‌ر ڕێبه‌ریی دوو لایه‌نی دێموكرات هه‌بێ بۆ هه‌نگاوێكی جیددی به‌ره‌و یه‌كگرتنه‌وه‌؟

بۆ نا... به‌ دڵنیایی‌یه‌وه‌ ده‌توانێ و توانیوێتی. باشه‌ من له‌ جه‌نابتان ده‌پرسم ئه‌ندامانی ئه‌م كه‌مپەینه‌ كێن؟ كێ پشتیوانی لێكردوون؟ ئه‌وان‌ چیان كردووه‌؟ ئه‌ندامانی كه‌مپه‌ین سه‌رجه‌م ڕۆڵه‌ی دێموكراتن و وەک باسم کرد ڕێبه‌رایه‌تی هه‌ر دوو باڵ، ده‌فته‌ری سیاسی و كۆمیته‌ی ناوه‌ندی، بەدە‌نە‌ و خه‌ڵك ڕاسته‌وخۆ و ناڕاسته‌وخۆ پشتگیری خۆیان له‌ كه‌مپەین یان له‌ ڕاستی‌دا لە پڕۆسەی یه‌كگرتنه‌وه‌ ده‌ربڕیوه. كه‌ وابوو كه‌مپەین به‌شێكه‌ له‌ بنەماڵەی گەورەی حیزبی دێموكرات، به‌شێكی وه‌ده‌نگ‌هاتوو، وه‌زاڵه‌هاتوو له‌ بارودۆخی ڕۆژهه‌ڵات و له‌ بارودۆخی حیزب.

من له‌ جه‌نابت ده‌پرسم: مه‌گه‌ر هه‌ر كه‌مپه‌ینی یه‌كی به‌فرانبار نه‌بوو كه بۆ‌ پشتیوانی له‌ مانگرتنی زیندانیان سیاسی گرتووخانەی شاری ورمێ هه‌ڵمه‌تی مانگرتنی سه‌رانسه‌ری له‌ كوردستان ڕاگه‌یاند؟ به‌ بێ پشتیوانییه‌كی ئەوتۆی ئه‌م دوو باڵه.

مه‌گه‌ر هه‌ر كه‌مپێنی یه‌كی به‌فرانبار نه‌بوو كه‌ هاتنی تیرۆریستێكی وه‌ك سه‌حراڕوودی لەگه‌ڵ وه‌فدی پاڕله‌مانی ئێران بۆ هه‌رێم شەرمەزار و مه‌حكووم كرد، بە میدیایی کرد. ئه‌مه‌ له‌ كاتێك‌دایه‌ كه‌ هه‌ڵوێستی فه‌رمی ئه‌م دوو باڵه‌مان نه‌بینی! مه‌گه‌ر هه‌ر كه‌مپەینی یه‌كی به‌فرانبار نه‌بوو كه‌ له‌ جه‌ریانی ئێعدامی ٦ به‌ندكراوی كورد نامه‌ و ته‌مری "باوکم ئێعدام مه‌كەن"ی بە تەواوی زمانە زیندووەکانی جیهان بۆ ئه‌منیستی ئینترناشنال نارد بۆ ئه‌وه‌ی ئیعدامی زیندانیانی كورد بكا به‌ مژارێكی جیهانی؟ مه‌گه‌ر هه‌ر كه‌مپینی یه‌كی به‌فرانبار نه‌بوو كه‌ هێرشی چه‌كدارانی یه‌كێتی نیشتمانی بۆ سه‌ر كه‌مپی ئازادی ئیدانه‌ ‌كردو...

ده‌ی بۆ نابێ كاریگه‌ریمان هه‌بێ؟ كام حه‌ره‌كه‌تمان به‌ دژی به‌رژه‌وه‌ندی نه‌ته‌وه‌یی بووه‌؟ كام حه‌ره‌كه‌تمان به‌ دژی به‌رژه‌وه‌ندی حیزبی دێموکرات بووه‌؟ ئێمه‌ خۆمان به‌ دێموكرات ده‌زانین و لامانوایه‌ لایه‌نی به‌رانبه‌ریشمان دێموكراته‌ هه‌ر بۆیه‌ ده‌بێ له‌ قسه‌ی یه‌كتر حالی بین.

هیچ ئیراده‌یه‌كی به‌هێز بۆ یه‌كگرتنه‌وه‌ له‌م دوو حیزبه‌دا ده‌بینن؟

بێگومان ده‌بیندرێ. هه‌رچه‌ند سیگناله‌كان هه‌ندێ جار له‌ كزی ده‌ده‌ن به‌ڵام به‌ گشتی ئه‌م ئیراده‌یه‌ بەهێزه‌ و دیاره‌ نكۆڵی له‌وه‌ ناكه‌م له‌ ناو بەدەنە و تەنانەت لە ئاستی ڕێبەرایەتی‌دا هه‌ن كه‌سانێك كه‌ به‌ دژی ئه‌م پڕۆسه‌یه‌ن کە زۆرم بە لاوە ئاسایی‌یە. دیاره‌ تێبینی هه‌ندێ كه‌س له‌ سه‌ربنه‌مای نیگه‌رانی دواڕۆژ له‌ جێی خۆی‌دایه‌ كه‌ ده‌ڵێن نابێ به‌ پێی ئه‌زموونه‌ تاله‌كانی ڕابردوو، یه‌كگرتنه‌وه‌یه‌كی ڕووكه‌شیانه‌ و ڕواله‌تی بێ و ده‌بێ به‌ وردبینییه‌وه‌ و له‌ سه‌ر بنه‌مای خه‌سارناسی ڕابردوو بێ، بۆ ئه‌وه‌ی به‌ر به‌ لێكترازانێكی تر بگیرێ ئه‌مه‌ ڕوانینێكی دروسته‌، بەڵام ئه‌م تاقمه‌ سنوورداره‌ی تر ده‌زانن كه‌ له‌ حیزبێكی یه‌كگرتوودا جێگایه‌كی ئه‌وتۆ بۆ ئه‌وان نییه، ئه‌وان ژانی كورسی گرتوونی! بەڵام هەوەک پێشتر باسم کرد پرسی یەکگرتنەوە بۆتە بایخێکی سیاسی کۆمەڵایەتی، کەس ناتوانێ بە دژی بوەستێ، بەڵام ئەوە بەم مانا نایە کە کەس ڕەخنەی نەبێ و نەوێرێ دەنگ هەڵبڕێ، ڕێک بە پێچەوانە دەبێ خەسارەکان بە باشی دەسنیشان کرێن، گرفتەکان تاوتوێ کرێن تا چی تر شاهیدی لێکترازانێکی تر نەبین.

ئه‌م له‌مپه‌رانه‌ چین كه‌ هه‌نگاوه‌كانی یه‌كگرتنه‌وه‌ی سست كردووه‌ ؟

ئه‌م پرسیاره‌ شابه‌یتی غه‌زه‌لی باسه‌كه‌مانه! ئیزن بده‌ بۆ وڵامی ئه‌م پرسیاره‌ پشت به‌ هه‌ندێ باسی تیۆریك ببه‌ستین. ئه‌وه‌ی ڕاستی بێ سه‌ركردایه‌تی حیزبی دێموكرات تووشی جۆرێ ئۆستووره‌ی چوارچێوه‌یی بووه. پۆپێر ده‌ڵێ من ماوه‌ی په‌نجا ساڵه‌ لەگه‌ڵ ماركسیسته‌كان، فرۆیدیسته‌كان و... كه‌ خاوه‌نی "ئۆستوره‌ چوارچێوه"‌ن ناسیاویم هه‌یه، هیچ كام له‌وان سه‌باره‌ت به‌ ڕوانگه‌ی خۆیان له‌مه‌ڕ جیهان و دیارده‌كان هه‌رگیز تووشی شك و دڕدۆنگی نابن و هه‌ر چه‌شنه‌ ده‌لیلێكی به‌ دژی ئه‌م چوارچێوه‌ی پێوه‌ی گرێدراون وه‌ها شرۆڤه‌ و ته‌فسیر ده‌كه‌ن كه‌ لەگه‌ڵ چوارچێوه‌ی ئه‌وان هاوئاهه‌نگ بێ. پۆپێر پێداگری له‌ سه‌ر ئه‌مه‌ ده‌كات كه‌ ئه‌و كه‌س و لایه‌نانه‌ی له‌ ناو فه‌رهه‌نگه‌كان و سوننه‌ته‌كان و چوارچێوه‌ جۆراوجۆره‌كان‌دان ئه‌گه‌ر له‌ سه‌ر بنه‌مای ڕاسپارده‌یه‌كی تایبه‌تی وه‌ك مێتۆدێكی تایبه‌ت حه‌ولی گفتوگۆ لەگه‌ڵ دیتران بده‌ن له‌ ڕه‌وتی دانوستانه‌كان‌دا تێده‌گه‌ن كه‌ لێك‌تێگه‌یشتنێكی ئه‌وتۆیان بۆ مسۆگه‌ر نابێ كه‌ وا بوو یه‌كه‌م گرفتی فكری بوونی ئه‌م ئۆستووره‌ چوارچێوەیە‌یه‌ كه‌ ده‌بێ لێی ده‌رباز بن.
پێم خۆشه‌ لێره‌دا ئاماژه‌ به‌ ده‌سته‌واژه‌یه‌كی جین شاڕپ ئیستراتێژیست و گه‌وره‌ بیردۆزی خه‌باتی بێ‌توندوتیژی بكه‌م واته‌ ئه‌تۆمیزاسیۆن. شاڕپ ده‌ڵێ ئه‌م خه‌ڵكانه‌ی كه‌ به‌ هۆی گوشاری ده‌سه‌ڵات توانایی هاریكارییه‌‌كی ئه‌وتۆیان نییه‌ بۆ مه‌به‌ستێكی هاوبه‌ش له‌ ڕاستی‌دا لەتوپه‌ت كراون ڕێك وه‌ك شكاندنی ماده‌ بۆ پاژه‌ پێكهێنه‌ره‌كان واته‌ ئه‌تۆم. ئێستا خوازیارانی یه‌كگرتنه‌وه‌ له‌ هه‌ر دوو باڵ‌دا یه‌كجار زۆرترن له‌وانه‌ی دژی یه‌كگرتنن بەڵام دەکرێ بڵێین ئه‌تۆمیزه‌ كراون، كه‌ وا بوو دووه‌م گرفت ئه‌م ئه‌تۆمیزاسیۆنه‌ی ناو هه‌ر دوو باڵه،‌ له‌ به‌ده‌نه‌وه‌ بگره‌ تا سه‌ركردایه‌تی، هەر بۆیە دەبێ هاوئاهەنگییەک لەناوخۆیان‌دا ساز دەن تا ببنە جەرەیانێکی شوێندانەر لە ناو باڵەکانی خۆیان‌دا و دواجار پەیوەندییەکی ئۆرگانیک لەگەڵ باڵەکەی تر.

كه‌ واته‌ له‌ باری فكرییه‌وه‌ بوونی ئه‌م دوو خاڵه‌ی ئاماژه‌م پێكرد بەداخەوە هه‌نگاوه‌كانی به‌ره‌وه‌ یه‌كگرتنه‌وه‌یان شل كردووه‌ بۆیه‌ بۆ چاره‌سه‌ری ئه‌م گرفته‌ نه‌زه‌رییانه‌ به‌ باوه‌ڕی من بۆ ئه‌وه‌ی یه‌كگرتنه‌وەکە‌ به‌ مه‌ره‌دی یه‌كگرتنه‌وه‌كانی پێشوو نه‌چێ ده‌بێ ئیزنی ڕه‌خنه‌گرتن ته‌نانه‌ت ده‌ڕبڕینی ڕای دژواریش هه‌بێ - به‌ مانای دژایه‌تی لەگه‌ڵ یه‌كگرتنه‌وه‌ - با بزانین ئه‌م ڕوانینه‌ چی پێیه‌ بۆ كوتن! کە وا بوو لە‌ هه‌ر سێ قۆناغی به‌ر له‌ یه‌كگرتنه‌وه‌، كاتی دانوستانه‌كان و لەمانه‌ش گرینگتر و چاره‌نووسسازتر قۆناغی پاش یه‌كگرتنه‌وه‌، ده‌بێ هه‌ر هه‌موو كه‌س بتوانێ لە کەشوهەوایەکی دێموکراتیک‌دا قسان بكا تا ئه‌م مژاره‌ به‌ ته‌واوی خه‌سارناسی و تاوتوێ بكرێ.

چەند ڕۆژێکە دۆخی نێوان دێموکراتەکان، هەر نەبێ لە دنیای مەجازی‌دا، تووشی ئاڵۆزی بووە و ئه‌وه‌ش کۆمه‌ڵێک نیگه‌رانی دڵسۆزانی یه‌کگرتنه‌وه‌ی لێکه‌وتووه‌ته‌وه‌. ئێوە لە کەمپەینی یەکی بەفرانبار کە زۆرتر خەمخۆری ئەو پرسه‌ بوون، چۆن دەڕواننە ئەو پرسه‌؟

ڕاسته‌. به‌ڵام نابێ ئه‌مه‌ له‌ بیر بكه‌ین كه‌ دنیای مه‌جازیش، به‌شێكه‌ له‌ ژیانی واقێعی و ئاسایی هه‌موومان، مه‌گه‌ جگه‌ له‌وه‌یه‌ كه‌ جه‌نابت و من له‌ چوارچێوه‌ی دنیایه‌كی مه‌جازی‌دا (وه‌ك كه‌ره‌سه‌یه‌ك) بە یەکەوە ده‌دوێین و له‌ هه‌مان كاتیش‌دا ئه‌مری واقێعین، مه‌گه‌ جگه‌ له‌وه‌یه‌ كه‌ ئێمه‌ وه‌ك كه‌مپینی یه‌كی به‌فرانبار سه‌ر به‌ دنیایه‌كی مه‌جازین و كه‌رەسه‌ی ئێمه‌ سۆشیال میدیای مه‌جازییه‌ به‌ڵام له‌ ناو هه‌ناوی واقێع‌دا هه‌ین. كه‌ وا بوو ئه‌م باسوخواسانه‌ی له‌ دنیای مه‌جازی‌دا دێنه‌ گۆڕێ هه‌ڵقوڵاوی واقعییه‌ته‌كانی كۆمه‌ڵگه‌ی خۆمانن، ته‌نانه‌ت من به‌ ئه‌رێنی وه‌سفی ده‌كه‌م – هەرچەند ڕه‌نگه‌ هه‌ندێ جاریش سنووری ئه‌خلاقییات ببه‌زێنێ - ئەز‌موونه‌ كاره‌ساتباره‌كانی ڕابردوو چ کاتی لێدابڕانەکانی حیزبی دێموکرات چ شەڕی براكوژی ئاگر و خوێنی رشتنی تێدابوو، ئێمە لەو قۆناغە ڕزگار بووین، دواتر پێك‌هه‌ڵپڕژانی فیزیكیمان بە چەکی سارد بینی، لەم قۆناغیش قوتار بووین... ئێستا لەم دنیای مەجازی و فەیسبووکەدا بە زمانی تانەوتەشەر بەرەوڕووی یەکتر بووینەوە... باش تۆ وەباڵم بۆ ناکێشی کە لەوسایەڕا هاتووینە ئەو پایەیە کارێکی گەورەیە؟ من دڵنیام ئەم قۆناغەش تێپەڕ دەکەین و دەگەینە قۆناغی دیالۆگ هەرچەند زۆر جاران ئەم وت‌ووێژە مەنتقییانەش دەبینین.

ره‌نگه‌ جه‌نابیشت له‌ من ئاگادارتر بی ڕاده‌ی ئه‌م كه‌سانه‌ش كه‌ له‌م دنیا مه‌جازییەدا ئاقاری باسه‌كه‌ به‌ره‌و فه‌زایه‌كی پڕ له‌ ڕ‌ق و ده‌مارگرژی ده‌به‌ن له‌ قامكه‌كانی په‌نجه‌ی هه‌رتک ده‌ست تێناپه‌ڕێ، هۆكاره‌كه‌شی ده‌گه‌ڕێته‌وه‌ سه‌ر ته‌عبیره‌ ئه‌رستوویی‌یه‌كه‌ی كه‌ ده‌ڵێ: توندوتیژی و ده‌مارگرژی به‌رهه‌می نه‌زانی و قه‌بووڵ نه‌كردنی "ئه‌و‌ی تر"ه‌ . له‌ لایه‌كی تره‌وه‌ به‌ش به‌ حاڵی خۆم پێموایه‌ هه‌ندێ له‌م قسه‌ و قسه‌ڵۆكانه‌ به‌رهه‌می زیاتر له‌ ٣٠ ساڵ كێشه‌ و ڕكابه‌رایه‌تی شه‌خسی نێوان چه‌ند كه‌سێكه‌ كه‌ ته‌شه‌نه‌ ده‌كاته‌ نێو لایەنگره‌ ده‌مارگرژه‌كانیان كه‌ وه‌ك ده‌روێشی جەزم‌بوو زیكری شێخه‌كانیان ده‌كەن... قه‌ی ناكا با ئه‌م ڕق و بوغز و قین هه‌ڵڕێژرێ... ئێستا جه‌نگه‌یه‌تی... به‌ گشتی پێموایه‌ ئه‌مه‌ شه‌پۆلێكی تیژتێپه‌ڕو هەیەجانییە كه‌ زۆر زوو جێمان دێڵێ و ئه‌م تاقمه‌ زۆر له‌وه‌ سنووردارترن كه‌ به‌ سازكردنی ئاڵۆزی و په‌شێوی له‌م دنیا مه‌جازییەدا بتوانن ده‌ورێكی نه‌رێنی له‌ سه‌ر کۆی پڕۆسه‌ی یه‌كگرتنه‌وه‌ دابنێن.

بێگومان هەم "نسکۆ و دابران"- ی کاک مستەفا هیجری و هەم "ڕوونکردنەوە یا هەڵبەستنی مێژوو"ی مامۆستا حەسەن‌زادە و "وەڵامێک بە نسکۆ و دابران"ی کاک جەلیل گادانیتان دیوه‌، ئەو نووسینانە تا چه‌نده‌ ده‌توانن کۆسپ بۆ بەردەوامیی کاری کەمپەین بۆ یەکگرتنەوەی دێموکراتەکان دروست بکه‌ن؟

پێم خۆشه‌ سه‌ره‌تا ئه‌وه‌ت عه‌رز بكه‌م دابه‌زاندنی ئاستی كێشه‌یه‌كی نه‌ته‌وه‌یی بۆ كێشه‌ی تاكه‌كه‌سی و شه‌خسی له‌ دۆخێكی خه‌سیو وه‌ك بارودۆخی ئێستای ڕۆژهه‌ڵات و حیزبه‌كان كاره‌ساته. له‌ سیاسه‌تدا ئه‌م مه‌سه‌له: جوابی ته‌حای، په‌حایه‌ جێگه‌یه‌كی نییه‌. نه‌ك هه‌ر ئه‌م كتێب و وتارانه‌، به‌ڵكوو به‌ گشتی له‌ مێژووی زاره‌كی‌دا به‌ تایبه‌تی ئه‌و كه‌سانه‌ی كه‌ بیره‌وه‌رییه‌كانی خۆیان خستۆته‌ دووتوێی كتێبه‌وه‌ خۆیان به‌ قه‌ولی "جۆج ئۆروێل" گوته‌نی بوونه‌ته‌ برا گه‌وره‌ و خۆیان قاره‌مانی داستانن، نموونه‌ زۆره‌ كه‌ ڕه‌نگه‌ لێره‌دا مه‌جالی د‌ركاندنی نه‌بێت. كه‌ وابوو هیچ توێژه‌رێكی مێژوویی بۆ لێكۆڵینه‌وه‌ی ڕووداوێکی‌ تایبەتی تەنیا پشت بەم بیرەوەرییانە نابەستێ و پێویستی به‌ به‌ڵگه‌ و داكیومێنتی باوه‌ڕپێكراوتر هه‌یه، تا دواجار بڕیارێکی زانستی و یەکلاکەرەوە دەربکا، هه‌ر چه‌ند ئه‌م بیره‌وه‌رییانه‌ له‌ ناخی خۆی‌دا وه‌ك ماتریاڵێكی كه‌لكیان لێوەردەگیرێ.

ڕه‌نگه‌ نووسینی کتێبی "نسكۆ و دابڕان" له‌م ساته‌وه‌خته‌دا كه‌ پرسی یه‌كگرتنه‌وه‌ لانیكه‌م به‌ شێوه‌یه‌كی سەرزارەکی لە گۆڕێ‌دا بوو، باری ڕەوانی پڕۆسەکەی نزم کردبێ و بووبێتە هۆی مشتومڕ و دژکردەوەی لایه‌نه‌كه‌ی تر، به‌ڵام كاك مسته‌فا ڕاشكاوانه‌ باسی له‌وه‌ كرد كه‌ ئه‌م كتێبه‌ ته‌نیا ڕای خۆیه‌تی (كه‌ ئه‌مه‌ بۆچوونێكی ڕاسته‌) و له‌ هه‌مان كاتیشدا پێی وا بووه‌ گێڕانه‌وه‌ی ڕووداوه‌كانی لێكترازان ئێستا باشتره‌ تا دوای یه‌كگرتنه‌وه‌، كه‌وابوو ده‌كرێ بڵێین به‌ڕێز كاك مسته‌فا هیجری گه‌ش‌بینه‌ به‌ یه‌كگرتنه‌وه‌ و ده‌یهه‌وێ كێشه‌كان به‌ر له‌ یه‌كگرتنه‌وه‌ بهارووژێنێ و ڕه‌نگه‌ دواجار چاره‌سه‌ری بكا. بۆیە دەڵێم گەش‌بینی کە لە وت‌ووێژێک لەگەڵ گۆڤاری سڤیل‌دا دەڵێ: ئێمە لەگەڵ ئەو هاوڕێیانەمان كە جیا بوونەتەوە، لە وت‌ووێژداین، چونكە دەمانهەوێ بە شێوەیەكی باش یەك بگرینەوە، بۆیە نەمویست نووسینەكە بە جۆرێك بێ، كە ببێتە كۆسپ لە بەردەم ئەو وت‌ووێژانە. هەرچەندە ئێستا ئەوان بەو نووسینەش زۆر ناڕەحەتن. ویستوومە ئەو فەزایەی كە زۆر تێكۆشاوین تاكوو ئارام بووەتەوە، جارێكی دیكە تێكنەچێتەوە و ئەو پەیوەندییەی لەگەڵیان‌دا هەمانە، بەردەوام بێت، تاكو بتوانین وت‌ووێژەكانمان درێژە پێبدەین.

وڵامی بەڕێزان مامۆستا حه‌سه‌‌ن‌زاده‌ و كاك جه‌لیل گادانی بێ ئەم‌لائەولا مافی خۆیانه. بەڵام من ناتوانم به‌ شێوه‌یه‌كی بایخدارانه‌ له‌م بابه‌تانه‌ بدوێم چون نه‌ په‌یوه‌ندییه‌كی ڕاسته‌وخۆم هه‌بووه‌ لەگەڵ‌ ڕووداوه‌كان و نه‌ شاره‌زای مێژووم كه‌ تاكولۆی باسه‌كان بخەمه‌وه‌ سەر یەک. بەڵام دەبێ ئەخلاق بەسەر هەموو کەلێن و قوژبنی کار و ژیانمانەوە دیار بێ، من پێموایە ئەم دوو نووسراوەیە دەبێ وەک دوو کتێب سەیر بکرێن، بخوێندرێنەوە و بە بەڵگە و سەنەد لە سەر وتەکان قسە بکرێ. ئەم وتارانەی نووسراون زۆربەیان لە ڕوانگەیەکی جیناحی، دەمارگرژانە، بەبێ مێتۆدێکی تایبەتی و خوێندنەوەیەکی بابەتییانە، بەبێ‌بەڵگە و... تەنیا بە مەبەستی کوتانی لایەنی بەرامبەری یەکتر نووسراوە، واتە هەروەک لەوە پێشتر باسم کرد ئەم فەزا کازبە تێدەپەڕێ، هەرچەند تایبەتمەندی کۆمەڵناسی ئێمە پێمان دەڵێ: چون تیۆری ماندوومان دەکا، قووڵ تێفکرین ماندوومان دەکا... بۆیە کەشوهەوای زاڵ بەسەر ئەم تاقمە سنووردارەدا عەقڵانییەتێکی گاڵتەجاڕییە کە لە ئاست‌نزمی سیاسی موتوربە کراوە. بەڵام ئیرادەیەکی بەهێزتر لەگۆڕێ‌دایە کە بەم چەشنە دژکردەوانە و ئەم کۆسپانە پاشگەز بێتەوە لە پرسی یەکگرتنەوە.

ئایا ئه‌و ئاڵۆزی و وه‌ڵام‌دانه‌وانه‌ کاری ئێوه‌ زه‌حمه‌تتر ناکات؟

بۆ وڵامی ئەم پرسیارە پێم باشە سەرەتا ئەوە بێنمە گٶڕێ کە ئەم هەمووە پێداگرییەی ئێمە بۆ یەکگرتنەوە چییە؟ باشە بە یەکگرتنەوەی ئەم دوو باڵە چ ڕووی دەدا؟ لە ڕاستی‌دا حەوجێ بە کوتن ناکا کە دۆخی ڕۆژهەڵات لەچاو باشوور و باکوور و ڕۆژئاوا چەندە کارەساتبارە، لە یەکەم ڕۆژی وەستانی قرمەی چەکی پێشمەرگە گوتاری ڕۆژهەڵات بوو بە پاشکۆی گوتاری باکوور و گوتاری باشوور، کە بە کردەوە دیتمان ئەم دوو گوتارە ناتوانن لەگەڵ بارودۆخی ڕۆژهەڵات خۆ بگونجێنن. زیاتر لە دوو دەیە چاوەڕوانی و دەستەوەستانی ئاکامەکەی هەنووکە بۆتە هیچ! دەردی خەسارەکانی لێکترازانیش بۆتە سەرباری هەموو دەردان. من پێموایە یەکگرتنەوەی مەنتقی لە سەر بنەمایەکی خەسارناسانەی ئەم دوو باڵە بە پێی قورسایی سیاسییان لە ناوخۆی وڵات و لە لای هێزە سیاسییەکانی تر، دواجار بەرەیەکی یەکگرتوو لەگەڵ حیزبەکانی تری ڕۆژهەڵات ساز دەکا و باری ڕەوانی ئەم یەکگرتنەوە دەبێتە شۆکێکی بەهێز بۆ کۆمەڵگای مەدەنی بۆ چالاکییەکی زیاتر و بەبڵاوتر، کە وا بوو ئێمە لامان وایە یەکگرتنەوە دەبێتە هۆی ساز بوونی گوتارێکی ڕۆژهەڵاتی کە دەتوانێ دواجار خەباتی شاخ و شار لێک گرێ بدا، هەرچەند ئەم باسە زۆر هەڵدەگرێ بەڵام بە کورتی بۆ وڵامی پرسیارەکەی جەنابت دەبێ بڵێم چون ئاکامی یەکگرتنەوەی دێموکراتەکان هاوکێشە سیاسییەکان لە کوردستان دەگۆڕێ سەرەڕای هەر چەشنە گرفت و زەحمەتێک بایخی ئەوەی هەیە زیاتری خۆ پێوە ماندوو بکەی

هیچ پڕۆژه‌ یاخود پلانێکی نوێی کاریتان هه‌یه‌؟

بەڵێ. ئێمە چەند پڕۆژەیەکی ترمان بە دەستەوەیە کە ئەوە کاریان لەسەر دەکەین:
* تەمبری "باوکم ئێعدام مەکەن" کە بۆ ڕێکخراوەی لێبوردەیی نێونەتەوەییمان ناردووە بە سەرجەم زمانە زیندووەکانی نەتەوەکانی دنیا، داواکاری کچۆڵەیەکی کوردە بۆ ئێعدام نەکردنی باوکی (کە بەداخەوە ئێعدام بوو).

* بە نیازین بۆ ڕێزلێنان لە سەرجەم بێژەرانی پێشووی ڕادیۆ دەنگی کوردستانی ئێران ڤیدیۆ کلیپێکی تایبەت ساز بکەین.

* لە سکاندیناوی سمینارێک بۆ خەسارناسی و هۆکارەکانی لێکترازانەکانی حیزبی دێموکرات لە مانگی داهاتوودا بەڕێوە دەبەین.

* قۆناغی هەڵمەتی ٣٠٤٠ واژۆ بە لابردنی پەردە لە سەر پەیکەرەی شەهید د. قاسملوو تەواو دەکەین و...
لە کۆتایی‌دا جێی خۆیەتی سپاسی سەرجەم ئەم کەسایەتییە سیاسی فەرهەنگی و لایەنانە بکەم کە پێمانەوە ماندوو بوون: ڕێبەرایەتی، ئەندام و لایەنگرانی هەردوو باڵی حیزب، خەڵکی ڕۆژهەڵاتی کوردستان بەتێکڕایی، کۆمەڵەی پێشمەرگە دێرینەکانی حیزبی دێموکرات لە سویس، کەمپەینی یەکبوون لە سوید، ماڵی کورد لە دانمارک، بێژەرانی پێشووی ڕادیۆ دەنگی کوردستانی ئێران، یەکێتی لاوان و یەکێتی خوێندکارانی هەر دوو باڵ، کۆمیتەی هەردوو باڵی حیزب لە فەنلاند، تلویزیۆنەکانی: ڕووداو، کوردکاناڵ، تیشک، دەنگی کوردی ئەمریکا بڵاڤۆکەکانی: ڕووداو، باس، وشە، کوردستان، ڕۆژنامەوانی‌و ماڵپەڕە ئینتێرنێتییەکان‌و... داوای لێبوردن دەکەم ئەگەر کەسێک یان لایەنێکم لە بیر چووە سپاسی بکەم. دەستی ڕێز بە سینگمەوە دەنێم بۆ چالاکی هاوڕێیانم لە کەمپەینی یەکی بەفرانباردا کە بە ڕووحێکی نەتەوەیی‌یەوە ئەرکەکانیان ڕاپەڕاندووە. سپاس بۆ ئێوەش کە ئەم دەرفەتەتان بۆ ئێمە ڕەخساند.