بەرانبەر بە |

"بێهروز ئاڵخانی" له‌ زیندانی ورمێ له‌دار درا

s_280_160_16777215_10_images_MANSHET_BehrouzAlkhani.jpgرۆژهه‌ڵات تایمز: به‌پێی ڕاپۆرتی ناوه‌ندی پارێزه‌رانی مافه‌کانی مرۆڤی کوردستان، سه‌رله‌به‌یانیی ڕۆژی سێشه‌ممه‌ 3ی خه‌رمانان، بێهروز ئاڵخانی زیندانیی سیاسیی کورد، به‌ مه‌به‌ستی جێبه‌جێکرانی حوکمه‌که‌ی، بۆ سلوولی تاکه‌که‌سیی زیندانی ورمێ گواستراوه‌ته‌وه‌ و حوکمی ناوبراو کاتژمێر ١ی سه‌رله‌به‌یانیی ئه‌مڕۆ چوارشه‌ممه‌ ڕێکه‌وتی ٤ی خه‌رمانان جێبه‌جێ کراوه‌.

له‌ راپۆرته‌که‌ی ناوه‌ندی پارێزه‌رانی مافه‌کانی مرۆڤی کوردستاندا هاتووه‌ که‌ کاتژمێر 1:10 خوله‌کی سه‌رله‌به‌یانیی ڕۆژی چوارشه‌ممه‌، زیندانیی سیاسیی کورد بێهروز ئاڵخانی وێڕای ٥ که‌سی دیکه‌ که‌ له‌سه‌ر مادده‌ی هۆشبه‌ر حوکم درابوون، ئێعدام کرا، به‌ڵام ته‌نیا ته‌رمی ئه‌م ٥ که‌سه‌ ڕاده‌ستی بنه‌ماڵه‌کانیان کراوه‌ته‌وه‌ و به‌ بنه‌ماڵه‌ی بێهروزیان ڕاگه‌یاندووه‌ که‌ بۆ وه‌رگرتنی ته‌رمی کوڕه‌که‌یان ده‌بێ نامه‌ی دادگا بێنن. ‌
بێهروز ئاڵخانی کوڕی فارس، له‌ دایکبووی ساڵی ١٣٦٤ی هه‌تاوی و خه‌ڵکی شاری سه‌ڵماس، له‌ ڕێکه‌وتی ٧ی ڕێبه‌ندانی ١٣٨٨ی هه‌تاوی وێڕای ١٥ که‌سی دیکه‌ به‌ تۆمه‌تی بوونی پێوه‌ندی له‌گه‌ڵ یه‌کێک له‌ حیزبه‌ کوردییه‌کانی دژبه‌ری کۆماری ئیسلامی له‌م شاره‌ ده‌ستبه‌سه‌ر کرا.
شایانی باسه‌ له‌ راستای هه‌وڵه‌ نێوده‌وڵه‌تییه‌کاندا بۆ ڕاگرتنی جێبه‌جێکرانی حوکمی له‌داردانی ئه‌م زیندانییه‌ سیاسییه‌ کورده‌، ڕێکخراوی “لێبووردنی نێوده‌وڵه‌تی” ڕۆژی سێشه‌ممه‌ 3ی خه‌رمانانی ١٣٩٤ی هه‌تاوی، له‌ راگه‌یه‌ندراوێکی فه‌رمیدا داوای له‌ کاربه‌ده‌ستانی کۆماری ئیسلامی کردووه‌ تا هه‌رچی زووتر حوکمی له‌داردانی بێهروز ئاڵخانی بوه‌ستێنن، که‌چی ئه‌و داواکارییه‌ی "لێبوردنی نێوده‌وڵه‌تی" له‌ لایان کۆماری ئیسلامییه‌وه‌ پشتگوێ خرا و سه‌رله‌به‌یانی ئه‌مڕۆ چوار شه‌ممه‌ له‌دار درا.